دا القط بتاع علاء صاحبي..علاء عنصري شوية صغيرين فسماه "قلبظ"

انا إن شاء الله هقولكم: ١- ليه "قلبظ" مقلبظ

٢- ازاي "قلبظ" يقدر يخس

(للأسف مش هقدر أقول الإجابة مباشرة مش علشان بحب ال suspence لكن فيه حاجات مهم تعرفوها علشان تعرفوا الإجابة )

١- ليه "قلبظ" مقلبظ: زمان في سالف العصر و الأوان لما جدود "قلبظ" كانوا عايشين في البرية بيصطادوا وقبل ما يستقروا عند جدود علاء ويعيشوا عيشة مرفهة كلها أكل من غير صيد وتعب كنا نقدر نقسمهم لقسمين

-قسم كان بياكل ويبقي سمين ومقلبظ

-قسم كان بياكل ويبقي رفيع ورشيق

فلما كانت بتحصل مجاعة القسم الأول المقلبظ كان بيستغل الدهون المقلبظة بتاعته ويقدر يتغلب علي المجاعة ويعيش

القسم التاني المش مقلبظ والرشيق مكنش بيكون عنده دهون كتيرة ومع الأسف بيموت في المجاعة.

القطط من القسم الأول عندها جوا جسمها حاجة اسمها "الجين المُقْتَصِد" The thrifty genotype ودا جين بيشتغل كدا هوه

-بيخلي جسمهم موفر للطاقة جدا عن طريق إن الأكل اللي بياكلوه بيستفيدوا كويس بالطاقة بتاعته وبيخزنوها جوا جسمهم في صورة دهون (معلومة رخمة وصغيرة استحملوها معلش هي ان الطاقة اللي جاية عن طريق الأكل وبالذات النشويات والبروتينات بتدخل الجسم عن طريق هرمون اسمه الأنسولين Insulin )

-بيزود الرغبة في النشويات ويقلل من الإحساس بالشبع

طيب يبقي اللي كان بيحصل هو إن القطط دي استعدادا للمجاعات بتزيد عندها الرغبة في الأكل وبيقل احساسهم بالشبع فبياكلوا كتير فبيبقي عندهم طاقة كتير فجسمهم يفرز انسولين كتير يخزنها في صورة دهون كتير فيبقوا مقلبظين ومستعدين لأي مجاعة ممكن تحصل..ولو المجاعة محصلتش واستمروا علي طريقة الأكل دي هيفضلوا مقلبظين ودا اللي حصل مع "قلبظ" : (

بما إن مبقاش عندنا مجاعات هقولكم في مقال تاني ان شاء الله تعملوا ايه علشان تخسوا انتوا و "قلبظ"

محمد حسن *_* ♡